Воскресенье, 16.12.2018, 05:52
Qırımtatar musicbeta
Приветствую Вас Гость | RSS
[ Новые сообщения (лента) · Участники · Правила форума · Поиск · ]
  • Страница 1 из 1
  • 1
Модератор форума: Дилявер, Refat  
Форум » Форум Qmusic » Поиск музыки » Къырымтатар халкъ йырлары (Къырымтатар халкъ йырлары By Сафие Разакова)
Къырымтатар халкъ йырлары
dembelДата: Среда, 02.02.2011, 19:24 | Сообщение # 1
Рядовой
Группа: Пользователи
Сообщений: 2
Репутация: 0
Статус: Offline
НАЛБАНДЫМ
Денъизе далайыммы,
Бир балыкъ алайыммы.
Ай къавушты,кунь къонды,
Даа ялварайыммы.
*
Ани,меним налбандым,налбандым,
Сарамадым,алдандым.
*
Денъизе далан билир,
Далмагъан ялан билир.
Яр къойнунда ятмагъан,
Яр къадрини не билир?
*
Ани,меним налбандым,налбандым,
Сарамадым,алдандым.
*
Айная бакъ,айная,
Не гузельдир айналар.
Сенсиз манъа арамдыр,
Бу ялагджы дуньялар.
*
Ани,меним налбандым,налбандым,
Сарамадым,алдандым.
*
Айналыдыр тюфегим,
Яралыдыр юрегим.
Нерде къалды,кельмеди,
Меним назлы севдигим.
*
Ани,меним налбандым,налбандым,
Сарамадым,алдандым.

ЧЫКЪА БИЛЬСЕМ
Чыкъа бильсем, чыкъа бильсем,
О яремнинъ кошкюне,аман,аман,
Толдур,толдур,вер ичейим
Назлы ярем ашкъына.
Аймы догъмуш,куньми догъмуш
О яремнинъ коксюне.
*
Севдим не чаре,не сёйлесем,
Яр эллере,яр идем!
Истерим,яреме варсам,
Аслым,аслым Гъариптир.
*
Эки къашы арасында,
вардыр,вардыр бир нишан,аман,аман.
Бир бакъыштын акълымы алды,
Этти мени перишан.
Аджеб ифля булурмумиш
Дюльбер иле къонушан?
*
Севдим не чаре,не сёйлесем,
Яр эллере,яр идем!
Истерим,яреме варсам,
Аслым,аслым Гъариптир.

ШУ КОЗЬЛЕРИНЪ ЯКЪТЫ МЕНИ
Шу козьлеринъ якъты мени,
Ильк корьгенде севдим сени.
*
Сени корьдюм,сени севдим,
Гуль киби сарарып солдым,
Ред этме, быракъма мени.
Сени корьдюм,сени севдим,
Кель,коксюме ят,мелегим,
Атешлере якъма мени.
*
Къалем къашл,сырма сачлы, яр,
Сенден гъайры меним кимим вар.
*
Сени корьдюм,сени севдим,
Гуль киби сарарып солдым,
Ред этме, быракъма мени.
Сени корьдюм,сени севдим,
Кель,коксюме ят,мелегим,
Атешлере якъма мени.

ЯВЛУКЪ
Бу явлукъны яр ишлемиш,
Чевресини нагъышламыш.
аслы санъа багъышламыш,
Не япайим,явлукъ,сени.
*
Багъчасарай багъчасында,
Анавы байнынъ акъчасында,
Нагъышландынъ башкъасына,
Не япаим,явлукъ,сени..

СЕВДИМ СЕНИ
Коктен ере атсанъ мени,
Атешлере якъсанъ мени,
Мезарлара къойсанъ мени,
Севдим сени,севдим сени.
*
Не дарылдынъ назлым манъа,
Ич бакъмайсынъ сен бу яна.
Дарылсанъ,кель барышайыкъ,
Бульбуль киби сарылшайыкъ.
*
Сени севдим,назлы мелек,
Сени корьсем,титрер юрек,
Сенсиз аят неге керек,
Инкяр этмем,севдим сени.

ЧИППИЙИМ
Айда,йылда бир байрам,
Эвинъи акъла,чиппийим.
Акъылчыгъым сен алдынъ,
Джойма,сакъла,чиппийим.
*
Ойнайыкъ,кулейик,бурада сефа сюрейик,
Ойнайыкъ,кулейик,бурада сефа сюрейик.
*
Чиппийим дедиклери,
Канфеттир едиклери.
Ич акълымдан чыкъмайджакъ,
Чиппийим дедиклери.
*
Чиппийим,чиппийим,кель,козюнъден опейим,
Бир опьтюрсенъ козюнъден,асла чыкъмам сёзюнден.
*
Шекер къыйыкъ,пакълава,
Сенинъ ашынъ,чиппийим.
Докъуз къызгъа денъишмем,
Къалем къашынъ,чиппийим.
*
Чиппийим,чиппийим,кель,козюнъден опейим,
Бир опьтюрсенъ козюнъден,асла чыкъмам сёзюнден.

Добавлено (02.02.2011, 19:10)
---------------------------------------------
ТЮРЛЮДИР КЪЫЗЛАРНЫНЪ ЧАГЪЫ
Он дёрт яшлы дживан къызлар,
Гульнинъ гъонджесине бенъзер.
Осип кельген назик бели,
Далнынъ инджесине бенъзер.
*
Он беш яшта къашын сюзер,
Зильфин янагъына тюзер.
Тазе къамыш киби осер,
Бою сельби дала бенъзер.
*
Он алты,яш,раатсызлар,
Кокреклер къабарыр,сызлар.
Бу яшында дживан къызлар,
Тазе ачмыш гуле бенъзер.
*
Он едиде алыр яшын,
Джоша-джоша багълар башын.
Индже,ойнакъ къалем къашы,
Окъ атылмыш яя бенъзер.
*
Он секиздир дели,чагъы,
Къайнар юрегининъ ягъы,
Дудакълары,гуль янагъы,
Шекер-шербет бала бенъзер.
*
Он докъузда ашкъы къозар,
Корьгенине эйлер назар.
Севдалыкъ чекмектен азар,
Эли багълы къула бенъзер...

МЕРДАНЕМ
Акъшам олса,дюльбер чыкъар мейдане,
Бакъа шу беяз,кумюш киби гердане.
Бойле къаш,бойле козь кимде вар,
Ал янакъта чифте бенълер сенде вар.
*
Меним ярем бу дюньяда бир дане,
Эгри къойма дал фесинъи,мерданем.
Бойле къаш,бойле козь кимде вар,
Ал янакъта чифте бенълер сенде вар.
*
Акъшам олса,гузель манъа дарылыр,
Саба олса,келип манъа сарылыр.
Бойле къаш,бойле козь кимде вар,
Ал янакъта чифте бенълер сенде вар.
*
Озен башы,сув башы да,мерданем,
Якътынъ юрегимнинъ башын,бир данем.
Бойле къаш,бойле козь кимде вар,
Ал янакъта чифте бенълер сенде вар.

Козьлерим думан-думан
козьлерим думан-думан,
Недир меним чектигим.
Башымы ястыгъа къойып,
Эджель терин тёктюгим.
*
Гунаимнынъ азабадыр,
Эп бу меним чектигим.
Хасталанып,тёшеклерде
Эджель терин тёктюгим.
*
Бир онъалмаз дерде тюштим,
Огърадым севдая мен.
Башыма алдым къайгъынъны,
Огърадым беляя мен.

КЪАРА КЪЫЗ
Ай,къара къыз,къара къыз,
Башынъ,сачынъ тара къыз.
Менден санъа файда ёкъ,
Бар,къысметинъ ара,къыз.
*
Ай,орайман,орайман,
Чёльде биткен къорайман.
Отькен-кеткен ёлджулардан
Мен яремни сорайман.
*
Ай,къара къыз,назлы къыз,
Мелеклерден шайлы къыз.
Менден санъа файда ёкъ,
Ол севгенинъ Аслы,къыз.

Султание
Нечун манъа сен расткельдинъ?
Нечун манъа бакъып кульдинъ?
Тынчлыгъымны нечун алдын?
Нечун манъа сен расткельдинъ?

Нечун бакътым козлеринъе?
Нечун тюштим излеринъе?
Къулакъ туттым сёзлеринъе?
Нечун бакътым козлеринъе?

Султание, Султание!
Юрегинъден мени чыкъар!
Чунки онда башкъасы бар!
Эки яргъа бир юрек тар.

Къачмакъ керек эдинъ менден,
Къачмакъ керек эдим сенден,
Энди янып куль олам мен!
Къачмакъ керек эдин менден!

Энди ич де манъа бакъма,
Юрегимни бетер якъма!
Сен къаршыма ич де чыкъма!
Энди ичте манъа бакъма.

Добавлено (02.02.2011, 19:11)
---------------------------------------------
ТОПУЗЛЫ ШАЛЫМ
Анам,меним топузлы шалым,
Топузы тёкульди.
Гъарип анамнынъ,гъарип бабамынъ,
Беллери букюльди

Анам,мени алдадылар,
Аткъа салдылар.
Мустафа бейнинъ вакъуфында,
Къурбан чалдылар.

Анам,меним кефинимни
Енъгем токъусын.
Джумаларда,Байрамларда,
Хатимлер окъулсун.

УЧМА КЪАРГЪАМ
Учма да,къаргъам,
Тутарым сени.
Къанатларынъ
Юлкъарым сенинъ.
Ельпазелер
Япарым сени,
Гузель-гузель ханымлара
Сатарым сени.
*
Аман,аман,
Шекерим ,аман,
Эвли де дегилим,
Бекярым аман....

ЧАЛ АТЫМ ЧАПА-ЧАПА
Чал атым чапа-чапа,
Кельдим ойната-ойната.
Эй, къыз,сенинъ бабанъы,
этеджегим къайната.
*
Аманым, дживаным,кель яныма,
Лиралары такъайым герданынъа.
*
Чал атымы чаптырдым,
Башына пошу такътырдым.
Къыз, сенимнъ пармагъынъа,
Алтын юзюк яптырдым.
*
Аманым, дживаным,кель яныма,
Лиралары такъайым герданынъа.

Эй, гузель
Яр, сырымда багъ олмаз,
Сия юзюм акъ олмаз.
Къомшусындан яр севгеннинъ,
Эй,гузель,эй,гузель,
Юрегинде ягъ олмаз,яр,яр,яр,аман.
*
Озен бою,сув бою,
Ярашыкълыдыр кою.
Ярем озю пек гузель,
Эй,гузель,эй,гузель,
Ала-чубардыр сою,яр,яр,яр, аман.
*
Багъчасарай шеэрдир,
Суву чюрюк неэрдир.
Нишанлысын къачыргъан,
Эй,гузель,эй,гузель,
Не апайдыр,не эрдир,яр,яр,яр,аман...

ШУ КЕЛЬГЕН КИМНИНЪ КЪЫЗЫ
Шу кельген кимнинъ къызы,
Фистаны вар къырмызы.
Янагъында гулю вар,
Санки саба йилдызы.
*
Насыл ашыкъ олмайым,
Ал янагъы гуль киби.
Насыл гонъюль вермейим,
Кираз дудагъы бал киби.
*
Гуль тюбюнден кечеркен,
Кене тюштим ашкъа мен.
Бу кетиш бойле кетерсе,
Достлар,яндым нара мен.

ЭЛЬМАЗ
Эльмаз киби, Эльмаз,парлайырсынъ,
сельби киби,ах,джаным Эльмаз,салланырсынъ,
Севген сайын,Эльмаз,назланырсынъ.
*
Ах,джаным Эльмаз,вах,джаным Эльмаз,
Сенден манъа яр олмаз.
Бу гузеллик,ах,джаным Эльмаз,
Эр кимде олмаз.
*
Мешребемнинъ,Эльмаз,къалайлы вар,
Гузеллернинъ,ах,джаным Эльмаз,алайы вар,
Яр севмесинъ ,Эльмаз,къолайлы вар.
*
Ах,джаным Эльмаз,вах,джаным Эльмаз,
Сенден манъа яр олмаз.
Бу гузеллик,ах,джаным Эльмаз,
Эр кимде олмаз.

Назлы-Назлы
Назлы-Назлы,кель яныма,
Ач эллеринъ,сар бойнума,
Чез коксюнъни,эля козьлюм.
*
Аман къыз,яман къыз,
Алдатма мени.
Алдап,тюрлю беляларгъа
Огъратма мени.
*
Сачынъ,зильфинъ тарамазсынъ,
Кучючиксинъ,ярамазсынъ.
Гонълюнъе денк буламазсынъ,
Нечюн джаным,эля козлюм.
*
Аман къыз,яман къыз,
Алдатма мени.
Алдап,тюрлю беляларгъа
Огъратма мени.
*
Акъшам олса варайыммы,
Сачынъ,зильфинъ тарайыммы,
Гизли-гизли сарайыммы,
Сёйле джаным, эля козьлюм..
*
Аман къыз,яман къыз,
Алдатма мени.
Алдап,тюрлю беляларгъа
Огъратма мени.

Добавлено (02.02.2011, 19:16)
---------------------------------------------
БОСТОРГЪАЙ
Эв алдында босторгъай да,
Арпа сепсем ашамай,
Яш ананынъ яш къызы,
Эй,арувым,
Энди бизге къарамай.
*
Эв алдында гуль теректе,
Ель эскенде саллана.
Устюне минген бир къушчыкъ,
Эй,арувым,
Йырлай,йырлай тавлана.
*
Эбабиль къушнынъ баласы да,
Джылгъада болур ювасы.
Джавун да джавса,сель алыр,
Эй,арувым,
Джылай да къалыр анасы.

АЙ, ВАР КЕТИР
Ай вар кетир, вар кетир,
Кельмесе, ялвар, кетир.
Эгильмегин будакътан
Тутулмагъан нар кетир.
*
Ай, вар да кель, вар да кель,
Хурмалы дал ал да кель.
Назлы къыз дудагъындан
Бир дамла бал ал да кель.

УМЮДЛЕРИМ
Умюдлерим эп къырылды,
Артыкъ ярем гельмееджек.
Козьяшларым докулюркен,
Бу алымы корьмееджек.
*
Агъласам да,айрылсам да,
Бу ашкъ менден кечмееджек.
Мени бир кунь кульдюрмеди,
Эльбет,о да кульмееджек.

САЛГЪЫР БОЮ
Яврум да Салгъырнынъ бою,
Озь тувгъанымнынъ да тою.
Кефеден,Керчьтен,Джанкойден келир,
Озюнинъ арув да сою.
*
Алтмыш баш,етмиш баш тувар,
Айда кет,Салгъыргъа сувар.
Узакъ ерден къыз алсан,
Анасы,быбысы джылар.
*
Яврум да Салгъырнынъ бою,
Озюмнинъ достумнынъ тою.
Аткъа минсе ярашыр,
Озюмнинъ сельби де бою.
*
Къайдадыр меним атларым,
Ат ойнаткъан заманларым.
Атларыма ич янмаз эдим,
Кечти яшлыкъ девранларым.

АСИЕ ХАНЫМ
Кимлерденсинъ, Асие ханым,
Кимлерденсинъ, оф аман, аман,
Мин файтона, гиделим,
Сен менимсинъ.
*
Арабайы атладым,
Файтонлар ектим.
Нидже йиллар Асие ханым,
Асретинъ чектим.
*
Ойлеми дерлер, Асие ханым,
Бойлеми дерлер.
Ах, шу яшлыкъ чагъыны,
Дерьямы дерлер.

ЗЕЙНЕБИМ
Зейнебим,Зейнебим, назлы Зейнебим,
Къызларнынъ арасында намлы Зейнебим.
*
Зейнебим,Зейнебим,шанлы Зейнебим,
Маллелер ичинде намлы Зейнебим.
*
Зейнебим,яптырдым алтындан къушакъ,
Узерине яздырдым "Мен санъа ашыкъ".
*
Зейнебим отурыр ташлар устюнде,
Сюрьмелер чектирген къашлар устюне.
*
Зейнебиме яптырдым филь тиштен таракъ,
Тара зилифлеринъни,гердана быракъ.
*
Зейнебимнинъ сачлара далгъа анъдырыр,
Атештир козьлери - юрек яндырыр.

АГЪЛАМА САРЫ КЕЛИН
Копюр тюбюнде бузлар,
Кокте сийрек йылдызлар,
Кель,кель,анам,
Шимди келип - кечеджек
Беяз герданлы къызлар,
Агълама да,сары келин,сар мени.
*
Къуш ювасындан учар,
Къанатларын кенъ ачар,
Кель,кель,анам.
Былтыр корьген назлы ярем,
Бу йыл менден къачар,
Агълама да,сары келин,сар мени.
*
Къар ягъар,ягъар,
Къыз къапындан бакъар,
Кель,кель,анам.
Башына ал гуллер такъып
Мени де атешке якъар,
Агълама да,сары келин,сар мени.

Добавлено (02.02.2011, 19:17)
---------------------------------------------
БУЛЬБУЛИМИ УЧУРДЫЛАР
Бульбулими учурдылар,
Ювасындан къачылдылар,
Севдигимден айырдылар,
*
Мен агъламай,
Ким агъласын.
*
Бульбулим кийдиги сары,
Мен чекерим аи-зары.
Эр кеснинъ вар севген яры,
*
Мен агъламай,
Ким агъласын.
*
Бульбулим кийдиги атлас,
Атласа инелер батмаз,
Сени севген ялынъыз ятмаз,
*
Мен агъламай,
Ким агъласын.
*
Эвлери вар юксек чардакъ,
Пенджереси демир пармакъ,
Къолаймы ярдан айрылмакъ,
*
Мен агъламай,
Ким агъласын.

АЗБАРЫМДА БАДЕМ ТЕРЕК
Азбарымда бадем терек,
Ешерсин де, ачылсын эп.
Анам мени не къаргъадынъ,
"Яш юрегинъ санчылсынъ" - деп?
*
Къаргъама, анам,сен къаргъама,
Сонундан пешман олурсынъ.
Къара ерге кирсем эгер,
Адыма асрет къалырсынъ.
*
Больницагъа хаста тюштим,
Айланамайым,анайым,
Белимдеки яраларгъа
Даяналмайым,анайым.
*
Сувсадым мен юректен,
Бир сув берсе,анайым.
Больницагъа манъа келип,
Алымы сорса,анайым.
*
Эвлерим вар,алчакъ да,юксек,
Бойламанъыз,анайым.
Эвлядларым оксюз къалды,
Хорламанъыз,анайым.

Усул-Усул
Усул,усул,усул,кель яныма назлым, аман,
Даяналмаёрым санъа эля козьлюм,аман.
Даяналмаёрым санъа,самур сачлым,аман.
*
Ол яреминъчытыр-пытыр теллери вар,
Ама не де томбул,беяз памукъ эллери вар.
Ама не де беяз памукъ томбул эллери вар.
*
Ал янакъта чифте-чифте бенълери вар.
Даяналмаёрым санъа эля козьлюм,аман.
Даяналмаёрым санъа,самур сачлым,аман.

ЭМ СЕВЕРСИНЪ
Эм северсинъ,эм севмезсинъ,
Акъшам олса кельмезсинъ.
Сырынъы манъа сёйледилер -
Сен башкъасын северсинъ.
*
Дере ташты,кечильмез,аман,
Суву буланыкъ,ичильмез.
Севдим сени узакълардан,
Яр,сенден вазгечильмез.
*
Дагълар къарлы,кечалмам,аман,
Суву салкъын,ичалмам,
Яр севмеси эгленджедир,
Асретинъи чекалмам....

МЕН АНАМНЫНЪ БИР КЪЫЗЫ ЭДИМ
Мен анамнынъ бир къызы эдим,
Чемберли олдым.
Ачылмамыш гъондже гуль эдим,
Ачылдым, солдым.
*
Мен бу гедже бир тюш корьдим,
Эвимиз оюлды.
Анемден гизли бир яр севдим,
Алемге дуюлды.
*
Ат айланмаз ерлерге,аман,
Арабам айланды.
Джаным севмез ерлерге,аман,
Башым байланды.
*
Янарсынъ,анам, янарсынъ манъа,
Яныгъынъ вармы?
Менден де гъайры ах, аначигъым,
Эвлядынъ вармы?

ЧАРЕ САЗЫМ
ЧАРЕ САЗЫМ - СЕНСИНЪ АНДЖАКЪ,
РАХМ ЭТ,АЛЛА АШКЪЫНА.
СЕНДЕ ЁКЪМЫ КЪАЛЬБИ-ВИДЖАН?
СЁЙЛЕ,АЛЛА АШКЪЫНА.
*
ЧЮНКИ,МЕН СЕНДЕН КЪАЗАНДЫМ,
ДЕРДИ,АШКЪЫ,ЭЙ МЕЛЕК.
КЪАЛЬБИМНИНЪ ФЕРЬЯДЫНЫ,КЕЛЬ,
ДИНЪЛЕ,АЛЛА АШКЪЫНА.

Добавлено (02.02.2011, 19:22)
---------------------------------------------
ХАСТА ГОНЪЛЮМ
Хаста гонълюм ятмакъ истер.
Гузель де,сенинъ дизинъде.
Агълетме мени,назлы да дюльбер,
Душманларым гульмесин.
*
Мен бу дерттен ифля олдым,
Буламадым чаресин.
Айырма мени лисанынъдан,
Душманларым гульмесин.
*
Мен бу гедже бир дюш горьдим,
Гендим ичюн урь яндым.
Агълатма,мевлям,сен факъырны,
Душманларым гульмесин.
*
Гозьлериме чектинъ перде,
Сен огъраттынъ мени дерде.
Дар янъмет ашур олундже,
Эллер сырымы бильмесин.

ЭКИ ЧЕШМЕ
Эки чешме ян-яна,
Сув ичтим къана-къана.
Сени догъуран ана,
Олсун манъа къайнана.
*
Салласана,салласана мендилинъи,
Акъшам олды,ёлласана севдигими.
*
Бир далда эки алма,
Бирин ал,Бирин алма.
Ялвардым мен санъа,
Джанымы ал,яреме алма.
*
Салласана,салласана мендилинъи,
Акъшам олды,ёлласана севдигими.
*
Бир далда эки кираз,
Бири ал,бири беяз.
Ялвардым мен санъа,
Бир мектюпчик манъа яз.
*
Салласана,салласана мендилинъи,
Акъшам олды,ёлласана севдигими.
*
Бир далда эки джевиз,
Арамыз дерья-денъиз.
Сен андан кель,мен мындан,
Къавушайыкъ экимиз.
*
Салласана,салласана мендилинъи,
Акъшам олды,ёлласана севдигими.

Яр,СЕНИНЪ КИБИ ГУЗЕЛЬ ОЛМАЗ
Яр,сенинъ киби гузель олмаз,
Асла гузеллигинъ солмаз,яр,яр,аман.
Бу джианда ич булунмаз,
Яр,булунмаз,яр,аман.
Кель,кене къал шу бекярлыкъ,
Мен де сени усть корем,яр,яр,яр,аман...

ШУ ЯЛТАДАН
Шу Ялтадан таш юкледим,
Гемим толмады.
Шу малледен бир яр севдим
Меним олмады.
*
Кель,кель,кель,аман,алайым сени,
Эгер къысметолур исенъ,сарайым сени.
*
Шу Ялтадан бир юзюк алдым,
Эльмаздыр ташы.
Шу малледен бир яр севдим,
Он секиз яшы.
*
Кель,кель,кель,аман,алайым сени,
Эгер къысметолур исенъ,сарайым сени.
*
Шу Ялтанынъ метинлидир
Япма лиманы.
Шу малледен бир яр севдим,
Ёкътыр иманы....

КЪАЛАЙЛЫ КЪАЗАН
Къалайлы къазан ичинде къаз баласы,
Къызыны манъы севдирген - озь анасы.
*
Къалайлы къазан ичиндекъаз этимиз,
Тойда,джыйында ойнамакъ адетимиз.
*
Белиме къушакъ яптырдым,чевреси сырма,
Анавгъа-мынавгъа козь атып,бойнумы урма.

БИР ТОП ГУЛЬ
Вердинъ манъа бир топ гуль,
Ешильдир япракълары.
Къырмызы гуллере бенъзер,
Яремнинъ дудакълары.
*
Келишинъ,кетишинъ,
Юрюшинъ,кулюшинъ тербиели.
Севдим сени,севдим сени,
Эй,къара козлюм.
*
Багъчалардан нар келир,
Куле-куле яр келир,
Бир элине нар алмыш,
Бир элине гуль келир.
*
Келишинъ,кетишинъ,
Юрюшинъ,кулюшинъ тербиели.
Севдим сени,севдим сени,
Эй,къара козлюм.
*
Узакътан корьдим сени,
Ал гуллер сандым сени.
Эки яр бир севильмез,
Я оны сев,ямени.
*
Келишинъ,кетишинъ,
Юрюшинъ,кулюшинъ тербиели.
Севдим сени,севдим сени,
Эй,къара козлюм.

ЭЙ, КЪЫЗ
Эй,къыз сенинъ сачларынъ,яр,яр,яр,аман,
Ойнар омуз башларынъ,яр,яр,яр,аман,
Къыз,сени алыр,къачарлар,
Дуймаз аркъадашларынъ.
*
Эй,къыз,сачынъ йиландыр,яр,яр,яр,аман,
Сар бойнума,доландыр,яр,яр,яр,аман,
Севсенъ,тек юректен сев,
Тилинъдеки яландыр.

Добавлено (02.02.2011, 19:23)
---------------------------------------------
ЭКИ КОЗЮНЬ - ЭКИ ЭЛЬМАЗ
Эки де козюнь - эки эльмаз,
Бундан эйи къаш олмаз.
Сачларынъ зифттен къара,
Бакъышынъ юз бинъ пара.
*
Айтайым санъа догърусын,
Къыз алсанъ, санъа ярашмаз.
паранъа базанып къыз алсанъ,
Ондан санъа яр олмаз.
*
Башынъдаки чемберинъ,
Къарадандыр,къарадан,
Эки яр бир севильмез -
Мен чыкъайым арадан.
*
Сепетимде юзюм вар,
Гузель, сенде козюм вар.
Кель,гузелим,багъчая,
Эки агъыз сёзюм вар.

ГОНЪЮЛЬ СЕНДЕН АЙРЫЛМАЗ
Не агъларсынъ,комюр козьлюм,
Гонъюль сенден айрылмаз.
Бу гузеллик сенде экен,
Гонъюль сенден айрылмаз.
*
Козьлеринъ вар къара-къара,
Устюнъе олмаз баяна.
Падиша олсам джиана,
Гонъюль сенден айрылмаз.
*
Эп гузеллер чифте кельсе,
Ашыгъынъ алындан сорса,
Дюнья толу гузель олса,
Гонъюль сенден айрылмаз.
*
Ашыкъ,баарь кельмейиндже,
Гъондже гуль дирильмейиндже,
Я сен,я мен ольмейиндже,
Гонъюль сенден айрылмаз.
*
Ярем сени алмайынджа,
Индже белинъ сармайынджа,
Къальбимиз бир олмайынджа,
Гонъюль сенден айрылмаз.

ЯГЪМА ЯГЪМУР
Ягъма ягъмур,эсме рузгяр,
Ёлда ёлдашым вар меним.
Шу гузеллер ичерсинде,
Бир севгеним вар меним.
*
Аман,аман,яр,аман,
Шу гузеллер ичерсинде,
Бир севгеним вар меним.
*
Белимдеки мартиним,
Оймалыдыр,оймалы.
Олдынъ дюнья гузели,
Насыл санъа тоймалы.
*
Аман,аман,яр,аман,
Олдынъ дюнья гузели,
Насыл санъа тоймалы.
*
Манъа явлукъ багъышласанъ,
Этрафында гуль олсун.
Кель,экимиз къавушайыкъ,
Дюнья зевкъы бу олсун.
*
Аман,аман,яр,аман,
Кель,экимиз къавушайыкъ,
Дюнья зевкъы бу олсун.

КЪЫРЫМ КЪЫЗЫ
Багъчада Къырым къызы,
Кокте Чолпан йылдызы.
Къалем киби къашлары,
Он секиздир яшлары.
*
Кель,сени алайым,
Мен де сени алайым.
Бабанъ разы олмаса,
Юректен ялвартайым.
*
Багъчада Къырым къызы,
Янакълары къырмызы.
Алма вердим,алмады,
Мен пешинден къалмадым.
*
Кель,сени алайым,
Мен де сени алайым.
Бабанъ разы олмаса,
Мен чаресин булайым.
*
Багъчада гуль-мелевше,
Къашларынъ коше-коше.
Гузелим,сени корьсем,
Акълыма Къырым тюше...

ZAREMA HANUM
HAMSE
Hamse ğoydIm tavaya, başladIm oynamaya.
AçtIm baqtIm hamse yoq, başladim ağlamaya.
*
Ey...Askerleri çapayur,tüfekleri atayur.
Osman paşa bayirdan küle-küle baqayur.
*
Yoldan taptIm bir qabaq, içi tolu danğalaq.
UrdIm yerge patladi,danğalaqlar çatladI.
*
Olmem men, olmem men,qara yerge kirmem men.
Qara yerge kirgen son bu sefayI sürmem men.

ЭМИНЕМ МАНТАР ТОПЛАЙЫР
Эминем мантар топлайыр,
Дерелери,тёпелери атлайыр.
Вардым пенджересине,
Эминем сачларыны топлайыр.
*
Аман,Эминем,не олды санъа,
Бир маса къурдым,кель есана.
*
Эминем,сачларынъ сырмалы,
Зейтун зилифлеринъ бурмалы,
Мурадым рахат къоймайыр,
Эминем,сени насыл сармалы.
*
Аман,Эминем,не япайым мен,
Сен толдур къаделери,вер ичейим мен.
*
Дагъда фындыкъ орманы,
Эминем,кимден алдынъ ферманы,
Бизе дерлер чакъырджы,
Ерсинъ,Эминем,къама ялманы.
*
Аман,Эминем,не олды санъа,
Бир маса къурдым,кель есана.

БАГЪЧАЛАРДА КЕСТАНЕ
Багъчаларда кестане,
Багъчаларда кестане,
Токулюр дане-дане,
Токулюр дане-дане.
Эй къыз,сенин дердинъденъ,
Олдым дели-диване.
*
Аманым,дживаным,кель яныма,
Лиралары такъайым герданынъа.
*
Багъчаларда фесильген,
Багъчаларда фесильген,
Шу гузель къыз ким экен,
Шу гузель къыз ким экен?
Бойле бир гузель даа,
Бу дюньяда вармы экен?
*
Аманым,дживаным,кель яныма,
Лиралары такъайым герданынъа..

Добавлено (02.02.2011, 19:23)
---------------------------------------------
КЪАРА КЪЫЗ
Ай,къара къыз,къара къыз,
Башынъ,сачынъ тара къыз.
Менден санъа файда ёкъ,
Бар,къысметинъ ара,къыз.
*
Ай,орайман,орайман,
Чёльде биткен къорайман.
Отькен-кеткен ёлджулардан
Мен яремни сорайман.
*
Ай,къара къыз,назлы къыз,
Мелеклерден шайлы къыз.
Менден санъа файда ёкъ,

КЪАРА БИБЕР
Къара бибер аш ичюн,
Яндым къалем къаш ичюн.
Ананъ сени догъурды,
Дели къанлы яш ичюн.
*
Къара биберим,биберим,
Ашкъа да сеперим.
*
Сув устюнде сандыгъым,
Сени севип-сайдыгъым.
Мен севип те,эллер алса,
Меним онъа яндыгъым.
*
Къара биберим,биберим,
Ашкъа да сеперим.
*
Сув устюнде папийим,
Ярем агълар,нетейим.
Агълама ярем,агълама,
Мен бир чаре этейим.
*
Къара биберим,биберим,
Ашкъа да сеперим.
*
Геми келир пейраздан,
Елькени вар беяздан.
Яреме бир сёзюм вар,
Шимди дегиль,бираздан.

ГОНЪЛЮМ ЭГЛЕНСИН
Къадир мевлям, сенден шудыр тилегим:
Вер манъа бир гузель,
Гонълюм эгленсин.
Эллере вермишсинъ, меним сучум не?
Вер манъа бир гузель, гонълюм эгленсин.
*
Чыкъайым "Акъ бабая", этейим нияз,
Я рабби, шу дюльбери
Ялвардым, манъа яз.
Алмадан къырмызы, памукътан беяз,
Шойле бир гузель олсун, гонълюм эгленсин.

СУДАКЪТА ОГЪРАДЫМ БИР ГУЗЕЛЕ
Судакъта огърадым бир гузеле, амн,аман,
Гузель кульдюрмеди,агълатты мени,эй.
*
Бенъи вар янагъында,
Балы вар дудагъында.
Диване яш чагъымда,
Бир гузеле урулдым,эй.
Урулдым да къушлара эм дуюлдым.
Фындыкъ фыстыкъ олурмы,
Атеш ястыкъ олурмы,
Быракътынъ,кеттинъ мени,
Бойле достлукъ олурмы,эй.
*
Судакъта ёлума тёктюлер тикен аман,аман,
Кёролсун тикени ёллара тёкен ай.
*
Гуле бенъзер янагъы,
Кираз киби дудагъы.
Нейлейим шу Судагъы,
Элимден яреми алды,эй,
Гонълюми чекильмез
Дертлере салды,эй.
Фындыкъ фыстыкъ олурмы,
Атеш ястыкъ олурмы.
Быракътынъ,кеттинъ,кеттинъ мени,
Бойле достлукъ олурмы.

СУВ ЯНЫНДА ШИШЕСИ
Сув янында шишеси,
Янында мелевшеси.
Кель, яныма отурчы,
Гонълюминъ эгленджеси.
*
Юзюгимде эки къаш,
Бири эльмаз,бири таш.
Яреми сорасанъыз,
Орта бойлу къалем къаш.
*
Эвимизнинъ алдындан,
Келип кеч,кяде-кяде.
Эвлилернинъ севгиси
Бекярнинъ севгиси
Бекярдан зияде.

Добавлено (02.02.2011, 19:24)
---------------------------------------------
АЛТЫН ЮЗЮК
Алтын да юзюк кесильмез,
Дердим де артар,эксильмез.
Куньде бинъ данесин корьсем,
Бириси санъа бенъземез.
*
Алтын юзюгим ташты,
Янды да юрегим башы.
Якъты да мени,яндырды,
Шу маалленинъ бир яшы.
*
Йипек явлукъ боянмаз,
Яргъа варсам,уянмаз.
Ярем эллер къучагъында,
Бунъа джанлар даянмаз.
*
Алмадыр сенинъ явлугъынъ,
Мормыдыр сенинъ явлугъынъ?
Ойнамайсынъ,ич кульмейсинъ,
Ёкъмыдыр сенинъ савлугъынъ?

Кене сени севеджегим
Козьяшым шарап олса,
Генчлигим харап олса,
Эр куним азап олса,
Кене сени севеджегим.
*
Арым,балым,бебегим,
Гулюм,далым,чечегим.
Бильсем ки,оледжегим
Кене сени севеджегим.
*
Не эмелим,не арзум,
Къалмаса ич умюдим,
Ирисем,битсен-бутюн,
Кене сени севеджегим.
*
Арым,балым,бебегим,
Гулюм,далым,чечегим.
Бильсем ки,оледжегим
Кене сени севеджегим.

ЧМА ДА ЯРЕМ ПЕНДЖЕРЕНЪИ
Ачма да ярем пенджеренъи,
Эсмесин эллер.
Меним перишан алымы
Корьмесин эллер.
*
Къыналы да пармакъларынъ,джаным,
Не назик эллер!
Мен бу халкъа нейлемишим?
Халкъ мени сёйлер.
*
Ачма ярем пенджеренъи,Учь ёл арасы.
Юречигим тельче-тельче
Тиллер ярасы.

УЗЕЛЬ КЪЫРЫМ
Алуштадан эскен еллер
Юзюме урды.
Балалыкъта оськен ерлер
Козюме тюшти.
*
Мен бу ерде яшалмадым,
Яшлыгъыма тоялмадым,
Ватаныма асрет олдым,
Эй,гузель,Къырым.
*
Багъчаларынъ,мейваларынъ
Бал иле шербет.
Сувларынъны иче-иче
Тоялмадым мен.
*
Мен бу ерде яшалмадым,
Яшлыгъыма тоялмадым,
Ватаныма асрет олдым,
Эй,гузель,Къырым.
*
Бала-чагъа Ватаным деп,
Козьяшын тёке,
Къартларымыз элин джайып
Дувалар эте.
*
Мен бу ерде яшалмадым,
Яшлыгъыма тоялмадым,
Ватаныма асрет олдым,
Эй,гузель,Къырым.

ПОРТ-АРТУРНЫНЪ КЪАЛЕСИ
Порт-Артурнынъ маллеси,
Не буюктир къалеси.
Солдат кеткен яшларнынъ,
Агълап къалыр анеси.
*
Агълама анам,агълама бабам,
Бельки мевлям къуртарыр.
*
Стакан толу сувмыдыр,
Япон ёлу бумыдыр.
Алла-алла падишаим,
Этеджегинъ шумыдыр.
*
Агълама анам,агълама бабам,
Бельки мевлям къуртарыр.
*
Сельби киби боюмыз,
Агълап къалды союмыз.
Порт-Артурдан къайткъан сонъра,
Олур бизим тоюмыз....

ПЕНДЖЕРЕСИ ЕШИЛЬ БОЯ
Пенджереси ешиль боя,
Саралмадым тоя-тоя.
Эгер сарсам тоя-тоя,
Мум якъардым бойдан-боя.
*
Пенджереси алтынъ пармакъ,
Антым олсун - сени сармакъ.
Агъзы шекер,тили къаймакъ,
Олурмы гузеле тоймакъ.
*
Пенджереси оймакъ-оймакъ,
Олурмы гузеле тоймакъ,
Бир сёз ичюн, шу гузелнинъ
Олурмы бойнуны урмакъ.

 
YigithanДата: Понедельник, 21.03.2011, 13:59 | Сообщение # 2
Полковник
Группа: Модераторы
Сообщений: 187
Репутация: 5
Статус: Offline
dembel, для этого есть тема Йырларнынъ сёзлери http://qmusic.at.ua/forum/2-37-1
 
Форум » Форум Qmusic » Поиск музыки » Къырымтатар халкъ йырлары (Къырымтатар халкъ йырлары By Сафие Разакова)
  • Страница 1 из 1
  • 1
Поиск:

Copyright Refat Ametov © 2018 Вся музыка на сайте представлена исключительно для ознакомительного прослушивания